រឿង បុរស២នាក់​រែក​ស្រូវ

ប្រជុំរឿងព្រេងខ្មែរភាគ ៣ ទំព័រ ១០៧ - ១០៨

    មាននិទានមួយថា : មានបុរស ២ នាក់ ម្នាក់រែកពូជស្រូវធ្ងន់ ម្នាក់រែកពូជស្រូវស្រាល ហើយម្នាក់រែកដើរទៅពីអាយ ម្នាក់រែកដើរមកពីនាយ ប្រទះគ្នានៅលើស្ពាន ១ ពុំព្រមចៀសគ្នា ប្រចាប់ចំបាប់គ្នាកំពប់ខ្ចាយស្រូវអស់ ហើយនាំគ្នាទៅប្ដឹងចៅក្រម ៗ យល់ថាកំពប់ខ្ចាយស្មើគ្នានឹងជំនុំជម្រះកាត់សេចក្ដីពុំបាន ហើយក៏នាំដំណើរនោះទៅ ក្រាបបង្គំទូលព្រះមហាក្សត្រ ។ ព្រះរាជាមានព្រះបន្ទូលដណ្ដឹងសួរទៅចៅ ១ ថា “ ស្រូវពូជព្រះស្ដែងតើស្រូវអ្វី ជាស្រូវធ្ងន់ ឬស្រូវស្រាល ? ” ។ ចៅនោះក្រាបទូលថា “ ស្រូវធ្ងន់ ” ។ ទើបទ្រង់សួរទៅចៅម្ខាងទៀតថា “ ចុះពូជស្រូវព្រះស្ដែង ជាស្រូវស្រាល ឬស្រូវធ្ងន់ ? ” ។ បុរសនោះក្រាបបង្គំទូលថា “ ស្រូវស្រាល ” ។ ព្រះមហាក្សត្រទ្រង់ត្រាស់បង្គាប់ថា “ អ្នករែកពូជស្រូវធ្ងន់ត្រូវសងអ្នករែកពូជស្រូវស្រាល ត្បិតអ្នករែកពូជស្រូវស្រាល គេប្រញាប់ទៅសាបព្រោះឲ្យបានស៊ីឆាប់ទាន់មាត់ ឯស្រូវធ្ងន់នឹងបង្អង់យូរទៅទៀតក៏បាន ” ។ ចៅទាំង ២ នាក់ ក៏ព្រមហើយក្រាបថ្វាយបង្គំលាទៅកាន់ទីលំនៅទីទៃ ៗ ហោង ។

រឿង បុរស២នាក់​មាន​គ្រោះ​ថ្នាក់

ប្រជុំរឿងព្រេងខ្មែរភាគ ៣ ទំព័រ ១០៥ - ១០៦

    មាននិទានមួយថា : មានបុរស ២ នាក់នៅត្រើយស្ទឹងម្ខាងម្នាក់ ។ បុរសម្នាក់ម្ដាយស្លាប់, បុរសម្នាក់ភ្លើងឆេះផ្ទះ ។ បុរសម្ដាយស្លាប់រត់ទៅរកម្ដាយ, បុរសភ្លើងឆេះផ្ទះ រត់ទៅលត់ភ្លើង ។ ចៅទាំង ២ រត់ទៅប្រទះគ្នាកណ្ដាលស្ពាន ។ ចៅ ១ ថា “ចូរឯងបើកផ្លូវឲ្យអញ ៗប្រញាប់ណាស់ ត្បិតភ្លើងឆេះផ្ទះអញ” ។ ចៅ ១ ថា “ ចូរឯងបើកផ្លូវឲ្យអញ ៗ ក៏ប្រញាប់ដែរ ត្បិតម្ដាយអញស្លាប់ ” ។ ចៅទាំង ២ នាក់ពុំព្រមចៀសគ្នា ហើយប្រចាប់គ្នាធ្លាក់ក្នុងទឹកប្រូងទៅ ទើបនាំគ្នាទៅប្ដឹងចៅក្រម ៗ កាត់សេចក្ដីឲ្យចៅទាំង ២ នាក់នោះពុំបាន ទើបចៅទាំង ២ នាក់ នាំគ្នាទៅគាល់ព្រះមហាក្សត្រ ក្រាបបង្គំទូលតាមដំណើរទីទៃៗ ។ ចៅ ១ ក្រាបបង្គំទូលថា “ ភ្លើងឆេះផ្ទះខ្ញុំ ព្រះបាទអម្ចាស់ ៗ រត់ប្រញាប់ទៅលត់ភ្លើង ចៅនេះពុំព្រមចៀស ” ។ ចៅ ១ ទៀតក្រាបបង្គំទូលថា “ ម្ដាយខ្ញុំព្រះបាទអម្ចាស់ស្លាប់ ខ្ញុំព្រះបាទអម្ចាស់រត់ទៅរកម្ដាយ ចៅនេះពុំព្រមចៀស ហេតុនេះទើបខ្ញុំព្រះបាទអម្ចាស់ទាំង ២ នាក់នាំសេចក្ដីនេះមកក្រាបបង្គំទូលព្រះអង្គ ” ។

អានបន្ត ៖ រឿង បុរស២នាក់​មាន​គ្រោះ​ថ្នាក់

រឿង បុរស​កម្សត់​ចេញ​ទៅ​ជួញ

ប្រជុំរឿងព្រេងខ្មែរភាគ ៣ ទំព័រ ១០១ - ១០៤

    មាននិទានមួយថា : មានបុរសកម្សត់ម្នាក់ចេញទៅជួញបានមាសប្រាំផែន នាំមកដល់ផ្ទះអាត្មា យកមាសនោះទៅកប់ក្រោមជើងជណ្ដើរ ហើយយកថ្មនិងកាំបិតដាក់លើ ។ ប្រពន្ធបុរសនោះមានស្មន់អន្ធករ ចៅស្មន់អន្ធករនោះលបស្ដាប់ក្រោមផ្ទះ កាលដែលប្ដីឡើងទៅលើផ្ទះ ប្រពន្ធដណ្ដឹងសួរថា “ អ្នកមកពីជួញតើបានអ្វីខ្លះ ? ” ប្ដីនោះប្រាប់ប្រពន្ធថា “ អញបានមាស ៥ ផែន ” ។ ប្រពន្ធដណ្ដឹងថា “ មាសទុកឯណា ? ” ។ ប្ដីប្រាប់ថា “ អញកប់នៅជើងជណ្ដើរ ហើយយកថ្ម និងកាំបិតសង្កត់លើ ” ។ ឯអាស្មន់អន្ធករមេនោះ វាឮហើយ វាទៅកាយយកមាស នៅក្រោមជើងជណ្ដើរនោះបាត់ទៅ ។ លុះព្រឹកឡើង បុរសនោះទៅមើលកំណប់មាសនោះឃើញបាត់ ហើយបុរសនោះថា “ ឯងអើយ ! អញកប់មាសនេះយប់ពន់វេលា ណាស់ហើយឥតអ្នកឯណាដឹងផងទេ មានតែថ្មនិងកាំបិតនេះឯង ឥឡូវនេះ

អានបន្ត ៖ រឿង បុរស​កម្សត់​ចេញ​ទៅ​ជួញ

រឿង ចោរ​លួច​គោ

ប្រជុំរឿងព្រេងខ្មែរភាគ ៣ ទំព័រ ៩៩ - ១០០

    មាននិទានមួយថា : មានបុរសម្នាក់ទិញគោ ១ ដឹកមកដល់ផ្ទះខ្លួន ហើយរៀបចំនំចំណីចងដៃជាស្រេច រួចបុរសនោះដឹកគោចេញទៅចងឯក្រៅឲ្យឆីស្មៅ ហើយទៅដេកក្រោមម្លប់ឈើ, កំពុងតែដេកលក់ស្រួល មានបុរសម្នាក់ដើរមកឃើញគោនោះក៏ស្រាយយកទៅ ។ បុរសម្ចាស់គោភ្ញាក់ឡើងពុំឃើញគោ ក៏ក្រោកឈរ មើលទៅឃើញចោរកំពុងដឹកគោនោះ នាំរត់ទៅ, បុរសម្ចាស់គោតាមទៅហៀបនឹងទាន់ក៏ស្រែកហៅថា “ វ៉ើយចៅដឹកគោអញទៅណា ? ” ។ ចោរនោះមិនស្ដី ។ បុរសម្ចាស់គោរត់ទៅចាប់ខ្សែគោអំពីដៃចោរ ។ ចោរថា “ យីអើ ! អញចង់អស់សំណើចនឹងចៅនេះពេកណាស់  គោអញដឹកពីផ្ទះអញមកម្ដេចក៏ចៅឯងមកចោទថាអញលួចគោចៅ ? ” ។

អានបន្ត ៖ រឿង ចោរ​លួច​គោ

រឿង បុរស៤នាក់​ជីក​កំណប់​មាស

ប្រជុំរឿងព្រេងខ្មែរភាគ ៣ ទំព័រ ៩៧

    មាននិទានមួយដំណាលថា : មានបុរស ៤ នាក់បបួលគ្នាទៅជីកកំណប់មាសជាមួយគ្នា លុះជីកទៅបានមាស ១ ក្រឡ ហើយយកមាសនោះមកចែកទាំង ៤ នាក់ស្មើគ្នា សល់តែមាស ១ ដុំ ហើយចៅទាំង ៤ នាក់ដណ្ដើមគ្នា ជជែកគ្នាពុំដាច់ស្រេចក៏នាំគ្នាទៅរកចៅក្រម ៗ កាត់សេចក្ដីនេះពុំបាន, ទើបនាំគ្នាទៅក្រាបបង្គំទូលព្រះមហាក្សត្រ ដោយដំណើរទីទៃ ៗ ។ ព្រះមហាក្សត្រទ្រង់ឲ្យយកចបចៅទាំង ៤ នាក់នោះមកថ្លឹង ចបចៅទាំង ៣ នាក់មានទម្ងន់ស្មើគ្នា ប្លែកតែចបចៅម្នាក់ធ្ងន់លើសគេ ទើបព្រះអង្គឲ្យមាស ១ ដុំនោះទៅចៅកាន់ចបធ្ងន់នោះ ។ ចៅទាំង ៤ ក៏ល្មមចូលចិត្តរៀងខ្លួន ។ ព្រះមហាក្សត្រទ្រង់កាត់សេចក្ដីដូច្នេះ ហៅសុគតិគមនំហោង ។

Flag Counter